今次呢間Club，我哋一嘍好少去，不過聽人講話依家好旺場，所以就決定去吓噉啦～
（查實最主要就係，嗰晚女仔唔使錢吖嘛！上次去過一次，飲嘢貴到死，個場又靜蠅蠅又盛！要畀錢喎～鬼都唔去呀！！:p）
嗰晚氣氛真係唔錯喎又～鬼死咁多人，迫到嘔電。
呢啲噉嘅環境，一定大把波餅食添呀！麻甩佬就最啱啦～
想行去痾篤尿吖？！！嘩～真係談何容易呀？！直頭要喺人堆之中，監生質出去至得咋！幾攞嚟賤吖～～ 
初初我哋重諗住Ladies Night係任飲嘅添！超！點知原來係得嗰一杯咁大把！咁大間嘢，啲裝修又賴係咁駕勢，又話幾“High 卡 ”又盛…真係孤Q寒呀！你慌我哋會喪飲咩？！就算係，又飲得幾多吖？！嘥鬼氣！
卒知我都係叫咗我一向至啱飲，而水準又好鬼穩定嘅06年“可樂”。
“可樂”？！！係呀！唔得架？斟出嚟唞唞氣先吖，唔該～
查實識得我嘅人，都知我至鐘意飲汽水，都不知幾麼登呀！^o^
我哋嗰晚就陰功囉~唔慌唔係名符其實嘅“One night stand”囉！間嘢雖然係老年咁大，但係位就唔多，晨早留留已經俾人霸晒，惟有成晚罰企！挑那星吖～好鬼攰呀～大佬！！人哋著住高踭鞋架嘛，好鬼死衰架！！＞◇＜#
就喺我哋企響豎，冇厘世藝，無無聊聊噉講吓東家長、西家短嘅時候，霎時之間彈咗條番鬼佬出嚟，嘍我哋傾計。哦～睇真啲呢條番鬼佬，頭先咪同另外兩條瞀里企響我哋對面嘅囉！事關其中有個幾靚仔，所以我有留意到佢哋頭先企響邊。:p（三姑丈，我…我係咁意睇吓架啫~唔使挖眼啩？！！
你自已響早幾晚夠猛話要睇大波亞姐啦！我咪一樣冇插你眼！嗱～ 一人一劑，當打和！擇日重賽啦！）
呢條番鬼佬，睇佢著得身光頸靚，斯斯文文噉，而個樣都算幾靚仔嘅。同一時間，呀大波蓮就俾兩條唔多識講廣東話嘅中國樣壯男圍。呀番鬼佬初頭都重好正常噉講一啲Clubbing廢話，點知，唔使一篤屁嘅時間啫，佢就開始“晒冷”嘞！又話份工幾巴閉，又話邊豎有物業，又話想搵個伴去歐洲玩，blah…blah…blah…
喂！又話番鬼佬唔興衒嘢嘅？！！超！我心諗：鬼佬，慳啲啦你！晒咗一輪冷，怕且係見我冇乜反應啩？！佢即刻轉台，今次重“士雕拔”添！玩估年齡喎！嘩～大佬！呢條咩鬼佬唻架？咁低B嘅？！！若果我三姑重係卜卜脆就話啫～噉人哋已經……（哎吔～差啲就爆咗自已大鑊添！:P）當時真係好想答佢：咁冇家教架你！我幾大，關你叉事咩？！依家又唔係孖你對襯家吖～使唔使畀埋個時辰八字過你添呀？！！小喇叭你吖～
不過諗還諗，表面上，我依然都重係保持住親切嘅笑容、溫文嘅談吐嘅～（鬼知佢會唔會係黑社會會員呀？！都係睇定啲穩陣。開講都有話啦嘛：小心駛得萬年船呀！）
最後……
哎吔！夠鐘宵夜喎！冇辦法喇～宵夜喎～唔通唔吔咩？！！欲知後事如何，請看下回分解嘞～
吓？又揼波鐘？！！妖～衰鬼咪玩啦！我唔揼波鐘唔通一嘢出真功夫咩～噉以後重有人肯同我打波嘅？！！霎戇嘅！XDDDDD
今晚風起夜寒呀！著多件衫呀！晚安喇～咁多位！^◇^
喂！！有冇搞錯呀？！！又試係一改嘢就多咗個框喎！雖則話呢豎唔使錢啫！都唔好噉搞吖～真係煩死人喇！！！
（技術佬：喂，又係咁？ XD ）
波餅
，我自己投降
