撞鬼囉！
原來對上嗰篇【羞家】已經係喺六月寫咕lu喎！唔知大家重記唔記得係講啲乜家伙嘅呢？
冇~~我想話睇吓可唔可以則則膊唔多覺噉，唔使繼續寫啫~~
事關我自已都已經唔鬼記得晒寫過啲乜？！！
你知啦~都隔咗咁鬼耐~洩咗度氣呀嘛！連“348”都執鬼埋咯！重“蛇乜鬼嘢腰火玫瑰吖”~~真係有啲老鼠拉龜，冇掟埋手嘅感覺添！！
哈哈！
哎吔~~算把喇！反正成個故仔，除咗“羞家”呢兩隻字係堅嘅之外，其他嘢都係老作嘅！（嗱，唔好話我知真係有人咁笨實，走去旺角搵呀《旺角蛇腰火玫瑰》呀吓，黐孖筋o架？！！哈哈哈哈！XDDDD）是鬼旦啦~~第三集，去片！！！>O<
大嬸：（青筋暴現，兩隻眼就唻跌出唻咁滯！用對手起勢噉叉住佢嗰條所謂嘅蛇腰~）我洗你條命！！究竟你依家想點先？死唔願扯，喺度撩交嗌！仆你個街！重搞到我一地餅碎添！！係咪真係搏我唔會行出唻你呀？我頂你個肺吖！ 三：（保持住儀態，陰陰嘴噉笑住唻回敬。） 大嬸：（突然收晒啲火喎~連本來叉起嗰對手，依家都淨係打交叉噉擺係心口啫。）死妹釘，我真係冇你咁好氣呀~~差啲領嘢！想孖我過招呀？！！哼~~未有耐夠班呀你！想拜師呢~就唔該交咗學費先啦！（跟住就一嘢“得”番個籮柚落張凳到，重連眼尾都唔“稍”吓我添！吓？唔係啩？！！噉我點同班Sina友交代呀？！！料又嗦唔到，交又嗌唔成。死火！噉我呢篇嘢點收科呀？！！
查實成件“羞家”事件，重有邊個清楚得過我吖~話說當日發生咗呢件事之後，雖則係就係覺得幾丟架，之但係又覺得好好笑噃~所以好想寫出唻等大家笑吓。但係又唔想俾大家知道個主角就係自已咁茂利！（雖然一早已經俾人估到呢條茂利“羞家”就係我本人，但係我一心諗住蛇咬都唔認o架嘛~嘻！
初時都重好哋哋嘅，點知行到銀行中心附近就出事嘞！感覺到呀“爸爸”愈sir愈低。嘩！堂時幾鬼驚佢會sir到落條腰呀！唔使我多口水，各位都知旺角係多人多得幾淒涼o架啦~~你話唔驚就假！我著住嗰件T-shirt又鬼死咁短喎，想話用件衫唻遮住都唔得，實行聽監生就噉掛係條腰嗰豎都得喇，死硬！好彩我都算醒目，重趕得切未sir到落咁低就禁得住！講真，禁得住又點吖！當時又冇辦法可以即刻“幽”番上去，響豎“半lung哽”噉吖！嘩~幾醜怪呀個姿勢，條腰彎彎哋，對手就死were住個手袋暗住個心口。幾鬼似道友呀！真該煨！！最後唔理三七廿一，一口氣衝咗過對面朗豪坊某時裝店，求其起件衫話要試，然後飛身入試身室，成件事至叫做搞掂咋~~ 跌爸爸呢味嘢，真係都唔知幾多年未試過。呢亭咁戇居嘅嘢，應該淨係發生喺啲小妹妹身上o架嘛~~我呢亭明明係識途老馬唻o架嘛！有乜可能會發生喺我身上吖？！！唉~總知呢趟就真係千年道行一朝喪喺啦~~爆！！T_T
|
（嘩！啲口水花請問重要唔要o架？！！差啲俾你噴到一面都係呀~大嬸！
）
